سئودیقین یارین الیندن توتاسـان، جـام آلاسـان

اؤپه سن لبلرین، او نـاز ائـده، سـن طعـم آلاسـان

مبتـلاسـی اولاسـان بیـر گـولـو اوزلـو گـؤزه لیـن

هر سحر کوسدوره سن، کؤنلونو آخشام آلاسـان

شـاعیـرانـه، نـه سعـادتلـی گــؤزه ل منظــره دیــر

باخیب اؤز ایسته دیگین دلبـره، بیـر کـام آلاسـان

شؤق لعلی یئتـر عشـق اهلینـه گـول چهـره لـریـن

نه گـرک سـاقـی الینـدن مئـی ِ گـول فـام آلاسـان

یا وئریب جان وطن اوغروندا، هنر گـوستـره سـن

یـا اولـوب عشـق اسیـری، بئلـه بیـر نـام آلاسـان

اووچو گورموش قوشو صیّاد چتیـن لیکـه تـوتـار

ساده دل بیر ائله قوش تاپ کی، اونو رام آلاسـان

بیر گؤزه ل وارمی کی، ناز ائیلـه مـه گینـدن بـاشقـا

یئریشیندن، دوروشوندان باخیب الهـام آلاسـان؟

بسدیر، ای خسته کؤنول، هیجر بلاسین چکدین

سن گرک وصلـه یئتیـب، بیـر قـدر آرام آلاسـان

واحد، انعام ائده جـک یـاریـم اؤز عـاشیقلـرینـه

بلکه بیـر لطفـه گلیـب سـن ده بیـر انعـام آلاسـان