گؤزدن آتدیم بو جهانی ، کی جهانیم سنسن

اؤزگه لردن نه اوموم ، تکجه گومانیم سنسن

یانسا باغریم ، کوله دؤنسه ، غم هجرانیندان

نه غمیم وار ، کی اورک دوستو ، یانانیم سنسن

آل جانیم ، تؤک قانیم ، ائی آفت جان باک ائله مه

گل کی ، بو دیزلریمه تاب توانیم سنسن

مین جانیم اولسااا فدادیر سنه ائی یار عزیز

نئیله ییم جانی ، کی خود روح و روانیم سنسن

دیله سن جانیمی ، باخ گؤر ، نئجه آسان وئررم

بیلیرم اؤلسم اگر ، مرثیه خوانیم سنسن

سنی گؤرجک کسیلیر نطق و بیانیم ، نه ائدیم ؟

بوندان آرتیق نه دئییم ، نطق و بیانیم سنسن

قوجالیق آلسا اگر تاب توانیم الدن

یئمه رم غم ، کی منیم بخت جوانیم سنسن

گئتدی بیر- بیر هامی ، سندن نئجه من ال گؤتوروم ؟

کی بو ائللرده فقط ، تکجه قالانیم سنسن ....